Greifenstein-Lied

NV Huss sprach der Michel uon Wolkenstain
So heczen wir sprach Oswalt uon wolckenstain
Za hürss sprach her lienhart uon wolkenstain
Sy müssen alle fliehen uon greiffenstein geleich.

DO hüb sich ain gestöber auss der glüt
All nyder jndie köfel das es alles blüt
Banczer vnd armbrost darzu die eysenhüt
Die liessens vns zu lecze do wurd wir freuden reich

Die handwerch und hütten und ander ir gezelt
Das ward zu ain‘ aschen jndem obern veld
Ich hör wer übel leihe das sey ain böser gelt
Also well wir bezalen herczog friderich

Schalmüczen schalmeussen nyemand schied
Das geschach uorm raubenstain jnndem ried
Das mangem ward gezogen ain spann lange nyet
Von ainem pfeil geflogen durch Armberost gebiett

Gepawren von sant jörgen die gancz gemaine
Die hetten uns gesworen falsch unraine
Do komen güt gesellen von Raubenstaine
Got grüss ew nachgepawern ewr trew ist klaine

Ejn werffen und ein schiessen ain gross geprewss
Hüb sich än verdriessen glöggel dich und seuss
Nu rür dich güt hofeman gewynn oder fleuss
Ouch ward daselbs besenget vil dächer unde meuss

Die boczer der ritten und die von Merän
Häfning der melten die zugen oben hran
Serntner senesyer die fraidige man
Die wollten vns vergernen do komen wir der von.

T&M: Oswald von Wolkenstein, Nr. 85, 1423