Viel liebe Grüße
Uil lieber grüsse / süsse / sich erheben / streben /
frölich / zölich / yetten / tretten jn das phat / drat / frü und spat /
hört man dringn’ / singn’ klingn’ / voglin jnden owen. /
Durch helle döne / schöne / jnden strauhen / rauhen /
esten / glesten / fliegen / kriegen / widerstreit / breyt / angerweyt /
sol man grünlich / künlich / sünlich / kurczlich ane schowen. /
Wjnder kalt / ungestalt / dein gewalt / ist enspalt / von den süssen lüfften /
liechten summ’ / Ane kummer / wil ich tummer / Als ein frumm’ /
gewden und güffte /
Grüner kle / iagt den snee / jarlag me / jnn den see / wilder meres flüte /
nachtigalle / droschel schalle / lerchen halle / uns geualle / für des ofens güte /
Dje blümen gële / hele / hübsch geuerbet / gërbet /
prawne / schawne / plawe / grawe / mangerley / may / dein geschray /
sich florieret / zieret / gieret / kösstlicher gelüsste /
Vnd hübsche wësly / grësly / sich entsliessen / spriessen /
hüglich / tüglich / plüde / früde / violsprancz / glantz / firlafantz /
Aller pame / zame / game / zier auss kalder früste. /
Stauden stock / machet schock / rauhen rock / als ein bock /
löblichen bedecket / swartzer doren / weysser koren / gar verloren ist der zoren /
den der winder wecket /
Küler brunn / warme sûn / geit uns wunn /gail dich nunn/
hinden auss dem kloster / bey dem Reyne / jndem scheine / als ein veine / bülbgyne / rayen nach den ostern /
Dje swammen stupffen / lupffen / auss der erde / herde /
würmly / türmly / wachen / machen / newen slauch / gauch / lock uns auch /
durch die haide / rayde / ir mayde / sücht der stauden winckel
Da well wir kosen / losen / mit beslossen / gossen / warmen / armen /
lieplich / dieblich / jnn dem busch / dusch / mündlin kusch /
ob die raine / klaine / saine / mir emblösst ein schinkel /
An ain knye / ich wer hye / des nit lye / und tet wie / ich das gefügen kunde /
zu ir rucken / freuntlich smucken / lieplich drucken / biegen bucken /
ob sy mir des gunde /
So wer quitt / was ich litt / hielt sys mit /
diesen stritt / müsst ich überwinden / sunder klifen / tasten grifen /
mänigen lifen / lust vertrifen / bleiben bey dem kinde / -
Oswald von Wolkenstein, Nr. 42, vor 1408?
| 
