Dat Leed von Hein

³/₄

1. Sin Vadder sä: Schoster, warr Schoster, min Hein!
   Man to, sä sin Mudder, denn hest du dat sein!
   Denn sittst du geruhig un dreuch achtern Disch,
   denn kriggt di keen Stormwind un bitt di keen Fisch.
   Junge, do dat nich, Junge, do dat nich,
   Junge, geef di nich mit Pickdroht af!
2. Hein dach nich ant Schostern, he dach an de See
   un snack all ganz bannig von Luv un von Lee,
   un lehr sick den Kumpass: de blifft nich bihus!
   Un steek all een Prüntje mol achter de Kus.
   Junge, lot dat doch, Junge lot dach doch,
   Junge, lot dat ole Prüntjen no!
3. Hein weur in Gedanken all lang op de Bark,
   weur Schippsjung un feuhl sick as Kniphof so stark,
   weur seekrank keen bitten un bang nich for fief;
   Labskaus un Schippsmettwurst: Minsch, Hein, holl di stief.
   Junge, fall doch nich, Junge fall doch nich,
   Junge, fall doch jo nich öber Bord!
4. Boots unner de Lien dorch un rin in ’n Passot,
   un denn um Kap Horn rum, dor wehr di, Jan Moot:
   Hushoch is de Dünung un hushoch de Roh,
   un swart sünd de Nachten, Hein, holl dich un stoh!
   Junge, beevt di nich, Junge, beevt di nich,
   Junge, bevert di noch nich de Büx?
5. Bahia, Buenos un Kanton süht Hein,
   in Rio un Kapstadt dor mokt he sick fein,
   Neejork, Pernambuco un Kardiff möt mit,
   denn runner no Sidey un Melbourne, dat sitt.
   Junge, denk doch mol, Junge denk doch mol,
   Junge, denk doch mol an Hamborg trüch!
6. Hein is all meist Stürmann, dor roppt dat: April!
   Un Hein, de ward Schoster, as Vadder dat will,
   un ballert de Stebeln un fleut lang de Stroot:
   Adjüst ok, min Seefohrt, adjüst, min Jan Moot!
   Junge, seet dor nich, Junge, seet dor nich,
   Junge seet dor nich een grote Uhl?
7. Nu kloppt he dat Ledder, dat ledder so dull,
   un Stine de quarkt em de Ohrn ok noch vull.
   Twolf Kinner – in ’n Keller – wat brust em de Kopp!
   Hein, klopp man, Hein, klopp man un kiek man nich op!
   Junge, harr ick bloß, Junge, harr ick bloß,
   Junge harr ick bloß no See hen gohn!

Text: Gorch Fock. M: nach Wohlauf noch getrunken.
Quelle: Fritz Jöde (Hrsg.): Hein Koptein. 12 frische scheune Leeder. No ole leeve Singwisen sungen von Gorch Fock. Hamburg ca. 1919, Richard Hermes Verlag

MIDI

PDF

LilyPond

PNG